Азийн аварга шалгаруулах тэмцээн нь 2008 оноос эхлэн Азийн улс орнууд рагбигийн хөгжлийн түвшин болон бүсчилсэн байдлаар 5 бүсэд ангилагдан жил бүр аваргаа тодруулдаг олон улсын А зэрэглэлийн томоохон тэмцээн билээ.

Монголын шигшээ багийн хувьд тус тэмцээнд 2009 оноос оролцож эхлэн оролцсон бөгөөд 2014 онд Азийн аварга шалгаруулах тэмцээний 4-р дивизонд Бруней болон Камбодж улсын шигшээ багуудтай өрсөлдөж аваргын цом хүртэж байсан түүхтэй.

2018 оны хувьд Монголын шигшээ баг Казахстан улсын Алмата хотод зохион байгуулагдах Азийн төвийн бүсийн аварга шалгаруулах тэмцээний 3-р дивизонд өрсөлдөх эрхтэй болж Пакистан, Казахстан болон Киргизистан улсын шигшээ багуудтай тоглохоор болоод байна. Энэхүү тэмцээний оноолт гарсан бөгөөд Монголын шигшээ багийн хувьд эхний тоглолтоо 2018 оны 5-р сарын 16-ны өдөр Ази тивийн шилдэг багуудын нэг тэмцээнийг эх орондоо зохион байгуулагч Казахстан улсын шигшээ багтай хийхээр учраа таараад байгаа юм.

Казахстан улсын шигшээ багийн хувьд Ази тивийн аварга шалгаруулах тэмцээний 1-р дивизоны баг бөгөөд 2016 онд Азийн Рагбигийн Холбоонооос шийтгэл хүлээн 2 жилийн хугацаанд олон улсын тэмцээнд оролцох эрхээ хасуулаад байсан билээ. 2017 оны Азийн Рагбигийн Холбооний жилийн эцсийн тайлангийн хурлаар эрхээ сэргээлгээд байгаа бөгөөд олон улсын тоглолтондоо чансаа бууж Азийн төвийн бүсийн аварга шалгаруулах тэмцээний 3-р дивизонд өрсөлдөхөөр болсон хүчирхэг баг юм.

Монгол улсын шигшээ баг 2018 оны 5-р сарын 19-ний өдөр эхний тоглолтын үр дүн болон Пакистан, Киргизистан улсын шигшээ багуудын тоглолтын үр дүнгээс хамааран хоёр дахь тоглолтоо хийнэ.

Иймээс Монголын Рагбигийн Холбоо 2018 оны 1-р сард 6 клубын тамирчдаас Монгол улсын шигшээ багт өрсөлдөх боломжтой тамирчдыг зарлан бэлтгэлдээ гараад байна.