Хан-Уул РК нь 2012 онд үүсгэн байгуулагдсан МРХ-ны гишүүн клуб юм. Үүсгэн байгуулагдсан цагаасаа эхлэн дотоодын болон олон улсын клубүүдийн тэмцээн уралдаанд идэвхтэй оролцдог ууган клубүүдийн нэг билээ.

Манай клуб нь 2012 онд зохион байгуулагдсан “Рагби Фестивал 2012” наадамд 10 хүний эрэгтэй баг, 7 хүний эмэгтэй баг тамирчдаа оролцуулж гараагаа амжилттай эхлүүлсэн юм. Бид баг тамирчдаа улсын аварга шалгаруулах болон клубүүдийн дундах тэмцээнд тасралтгүй оролцуулж ирснээс гадна Шигшээ баг болон Улаанбаатарын Дайчид клубын тамирчдын бүрэлдэхүүнийг хангахад гол анхаарлаа хандуулдаг.

Хан-Уул РК нь эрэгтэй 15 болон 7, эмэгтэй 10 болон 7 хүний рагбигийн багтай бөгөөд эрэгтэй 36 тамирчин, эмэгтэй 16 тамирчин нийт 52 тамирчинтай.

Хан-Уул РК нь 2019 онд БНХАУ-ын Бээжин хотод зохиогдсон тэмцээнд МРХ-ны гишүүн клубүүдийн тамирчидтай хамтран анхныхаа олон улсын клубүүдийн тэмцээнд амжилттай оролцсон.

Манай клубээс 2013 онд Хонг Конгийн дээд лигийн Пандас РК-т Б.Наранбаатар нь 2013-2014 оны лигт тоглож байсан билээ. Мөн манай багт хамгийн олон легионер тамирчид тоглож байсан сонирхолтой түүхтэй юм.